政Whats噏：葉建源送梁繼昌「紅軍大勝」揮春

農曆年就到，好多立法會議員都會落區寫揮春送畀街坊，而每年都喺立法會擺擋寫揮春畀議員嘅教育界議員葉建源，大家估吓佢今年嘅第一張揮春送咗畀邊個？仲要係寫「紅軍大勝」喎。咁離奇？

葉建源今日(13日)喺Facebook上載咗幾張寫揮春嘅相，首個得到佢墨寶嘅幸運兒就係會計界議員梁繼昌，原來梁繼昌要帶啲揮春畀佢喺英國讀書嘅仔。葉總共寫咗4張，當然包括學業進步、出入平安呢啲例牌吉祥揮春，不過其中一張係「紅軍大勝」，佢都覺得好奇怪，問梁繼昌點解寫「紅軍大勝」？原來梁嘅仔係利物浦球迷。利物浦足球隊外號「紅軍」，大家明晒喇！