政Whats噏：謝偉銓零的突破　開齋做法案委員會主席

立法會建築、測量、都市規劃及園境界議員謝偉銓(Tony)喺去年初重返議會，奈何議會內唔少委員會或議題都已經有議員「吼實」，令佢遲遲都未有特別大「發圍」。幾經努力，Tony終於有「零的突破」出任一個法案委員會主席。

《消防安全(工業建築物)條例草案》委員會今早(14日)召開首次會議，由委員會內年資最深嘅議員涂謹申主持選主席，由工程界盧偉國提名及議員陳克勤和議下，Tony喺零競爭下出任主席。其實過去一年來，據悉有唔少重要委員會Tony都想爭，可惜其份屬嘅建制派「六人組」成員喺唔少委員會擔任主席，令Tony更難爭位，要到今年先做到首個委員會主席。