政Whats噏：審禁歧視餵母乳　容海恩姊妹代出頭做主席

政府正修訂多條歧視條例，當中明文禁止基於餵哺母乳嘅直接及間接歧視，條例對懷孕中嘅立法會議員容海恩非常貼身，難怪佢都有加入相關法案委員會。不過正副主席呢啲吃力工作就並非由容海恩擔任，而係落入另兩位女性議員身上，其中一位仲係為容海恩婚禮擔任姊妹嘅麥美娟喇。

負責審議有關條例嘅《2018年歧視法例(雜項修訂)條例草案》委員會今日(14日)召開首次會議，需要選出正副主席，雖然條例與容海恩相當密切，但擔任主席工作量唔輕，而且容又臨盆在即，將於今個月尾榮升媽媽，所以唔搵佢出任正副主席都好正常，不過最終都係選出女性「掌權」。

建制派派出麥美娟同葛珮帆嚟選，泛民主派就派法律界郭榮鏗應戰，最終麥同葛分別出任正、副主席。選副主席期間陳志全似乎就發現好大機會由兩個女性話事，麥美娟就笑着反問點解唔可以，話呢啲算係偏見，講笑話委員會要處理下呢啲歧視問題喎。