政Whats噏：區會圍轟環保署　建制播打樁聲抗議

近年不時有民主派議員喺議會內搞抗議，曾經有人開防狼器，又有人用鐵鍊鎖腳等，但呢類抗議已不再是泛民「專利」。深水埗區議會今日(15日)開大會，建制派區議員梁文廣趁官員發言期間，突然廣播地盤打樁聲，「嘭、嘭、嘭」巨響不停，嚇得在場人士「醒晒」！

環保署署長唐智強今到訪區議會，席間跨黨派議員「圍揪」署長，由回收講到噪音，毫不留口，開口就轟。梁狠批當局嘅技術備忘錄內，列明喺啲「聲音敏感」地點即法院及學校附近工程，只可以在中午及傍晚開工，對附近居民造成滋擾要求檢討。

唐回應時強調當局依法辦事，係「怕」嘈到法庭先有相關安排。呢個「怕」字迫令梁文廣即開廣播，話啲打樁聲同民居就係咁近，「你話怕法院嘈」，市民最怕就係咁講，坦言法院同地盤距離6條行車線啊！區議會主席張永森勸阻無效，宣布休會5分鐘，及後亦怕梁再廣播，多番要求將廣播器放到佢枱頭。