政Whats噏：羅致光中年論惹議　卿姐嘲變冇腦

政府收緊長者綜援申領門檻激起民憤，曾被譽為民主黨(白鴿黨)大腦的勞工及福利局局長羅致光，尋日(14日)爆金句「如果人人120歲，60歲都只係中年」遭全城非議。白鴿黨前主席劉慧卿(卿姐)今日(15日)於其網台節目上，與羅致光劃清界線，直言「(佢)可能變咗冇腦」！

卿姐今訪問民建聯(民記)副主席陳勇，笑稱按羅的說法，現年49歲的陳勇都係「幼年」，陳則大讚66歲的卿姐係活力「中年」。陳又話，該黨希望爭取對長者多啲照顧，反問卿姐點睇白鴿黨前大腦羅致光嘅做法，卿姐即稱「可能變咗冇腦」，如果90歲先係長者真係「離晒大譜」。

卿姐更話有指官員唔見建制派，直問係咪有咁嘅事？陳反過嚟問羅致光係咪成日見白鴿黨，直言依家無話逢旨啲票係自己嘅，該黨唔係百分百必須支持，有時都會反對政府喎！

另外，卿姐做咗黨內國際事務委員會主席，陳曾喺訪問話做法如不肖子勾結黑勢力，卿姐今日當面澄清，話冇叫過外國制裁香港，叫陳唔好再拉埋嚟講。