政Whats噏：鄉議局倡六隧免費　彌補三隧分流加價

政府計劃調整3條海底隧道收費分流過海車龍，但社區反對聲音大。鄉議局今日(15日)舉行執委會會議就話支持計劃，但重申大眾對紅隧同東隧加價有好大意見，更提出豁免6條新界隧道收費。

鄉議局將會就財政預算案約見財政司司長表達意見，屆時會提出豁免獅子山隧道、大老山隧道、城門隧道等6條新界隧道收費，認為可以減輕打工仔交通開支，又能夠彌補日後「三隧分流」實施後所帶來嘅額外交通開支。

鄉議局更認為豁免六隧收費後，車輛過隧道時就毋須停車繳費，可以紓緩繁忙時間交通擠塞問題，亦能減省收費亭嘅人手同開支。鄉議局初步計算，6條隧道每年有23億港元收入，而政府年收入逾千億港元，認為財政上可行。

另外，去年施政報告提出「明日大嶼」嘅天價大型填海造地計劃，執委會上有人表明難以認同及支持計劃，因計劃忽略咗大嶼山配套及民生設施，完全無惠及附近鄉村，直言支持計劃會難以向村民交代。