政Whats噏：戴耀廷操控選舉無王管　張國鈞鬧爆

香港大學法律系副教授、違法佔中發起人戴耀廷喺2016年立法會選舉中發起雷動計劃，呼籲選民策略性投票，被外界鬧爆係「配票」干預選舉，意圖操控選舉結果。立法會今日(16日)審議修訂選舉法例嘅草案時，建制派嘅議員張國鈞重提雷動計劃，指今次條例修訂冇加入相關嘅規管條文，批評雷動計劃限制選民投票意向，搞到當時幾個較為資深、選情穩定嘅民主派候選人，變成低票當選，甚至不幸落選，直斥戴耀廷為求贏得選舉，不擇手段。

立法會今日通過咗《2018年選舉法例(雜項修訂)條例草案》，但修訂嘅焦點多數放咗喺改善選舉程序上，例如加重選民登記罰則，如有關選民登記的虛假聲明刑罰，由罰款5000港元和監禁6個月，上調至罰款1萬港元及監禁2年，同埋豁免第三者喺網絡上選舉活動引起嘅電費和網費、簡化上訴機制等。

身兼該法案委員會主席嘅張國鈞覺得今次修訂仲有好多未能涵蓋嘅地方，例如近年選舉中，好多有相同陣營嘅候選人參加一個選區，但最後又棄選，然後只留一名「真命天子」，呼籲市民投票投晒畀「真命天子」，但鑑於每位候選人嘅選舉經費、論壇發言時間都係有限，棄選嘅做法變相就令「真命天子」得到更多資源，如棄選者喺論壇上不斷攻擊對手，咁「真命天子」就可以留番啲時間去介紹自己嘅政綱同理念，造成選舉不公平。

其實，泛民私底下都鬧爆戴耀廷好做唔做，搞個雷動計劃出嚟，累及自己友添！而喺過去一段時間，建制派議員亦多次要求政府修例堵塞相關漏洞，但政府似乎聽唔入耳咁，難怪張國鈞要再鬧多次。

但法律界議員反駁，指雷動計劃只係嘗試組織民主派所有嘅選票，令選票唔會浪費，又指建制派在選舉時都會配票，唔覺得呢個做法有問題。

政制及內地事務局局長聶德權回應時就話，今次修訂旨在改善目前選舉條例，以應付今年嘅區議會選舉同來年嘅立法會選舉，當中大致可分為改善選民登記制度、擴大裁決官範圍、輍免第三者在網絡上嘅選舉活動引起嘅電費同網費、理順投票程序等方面，至於議員所提及未能涵蓋嘅範圍，佢解釋係因為社會上仍有爭議，強調政府都有處理緊有關問題。