政Whats噏：小販公聽會流會　建制泛民齊認衰

近年立法會流會已成常態，依家唔止一般會議，就連公聽會都流埋一份。今日(18日)立法會食物安全及環境衞生事務委員會原本舉行公聽會，傾重新編配空置小販攤位嘅建議安排，有超過40個團體代表出席，不過因為議員出席法定人數不足而流會。有出席嘅委員會主席郭家麒即刻向公眾同團體代表道歉，但業界難掩憤怒，點名批評身兼委員會副主席嘅批發零售界議員邵家輝，作為業界代表都缺席，十分令人失望。

公聽會原定今朝9點召開，但最終喺15分鐘嘅法定時間內，連埋郭家麒都只係得8名委員，仲爭2人先至夠10名嘅法定人數，結果流會收場。出席議員中泛民佔4人，包括郭家麒、民主黨尹兆堅、專業議政邵家臻同埋議會陣線陳志全，而建制派當中，只有自由黨張宇人、獨立陳凱欣同埋勞聯潘兆平3人出席，民建聯、工聯會同經民聯連人影都唔見，而獨立嘅醫學界陳沛然都有出席。

該委員會總共有30名委員，都會搞到流會，認真肉酸。有團體代表炮轟話，好多檔販要犧牲休息同埋開檔時間，爭取向議員及政府表達意見，但家陣就撲個空，覺得好失望。被點名鬧嘅邵家輝解釋話，本身都冇報名出席會議，因為一早安排咗今朝出席業界嘅早餐會，原本計劃之後趕返立法會，無奈流咗會。

委員會之中，民建聯佔7人，屬委員會內最大政黨板塊，但竟然全部缺席。該黨嘅食物安全及環境衞生事務政策發言人何俊賢(高佬賢)都係其中一人，佢解釋因為朝早同業界喺廣東省開會，所以本身冇報名出席。但佢話，今次加開公聽會嘅時間係由主席決定，仲話如果喺正常會議加插公聽會，就唔會出現問題喎。言下之意，似乎將責任卸咗畀郭家麒。

不過，作為委員就有責任出席會議，高佬賢都賣口乖話，會盡量出席下次公聽會，亦會盡量協調該黨議員有代表出席。高佬賢做咗6年幾議員，都仲要甩咗轆先知衰，唔知下次仲敢唔敢再咁「Hea」呢？

至於泛民方面，都有7人冇開會，其中議會陣線3人、民主黨2人、公民黨同專業議政各有1人。區諾軒接受查詢時就對事件致歉，解釋話因為當時同政府開會。民主黨黃碧雲就冇回應查詢。