政Whats噏：下周三剖腹生B　容海恩話仲未改名

立法會議員容海恩上年與當時同政黨嘅政策總裁袁彌昌奉子成婚，而容海恩更將會成為首個任內生BB嘅女議員喇。現時距離與BB見面不足一個星期，不過容海恩同袁彌昌都話中英文名都未改好喇。

容海恩將會喺下周三(23日)剖腹生BB，前一日就會入院，而BB就會按族譜改名，將會係「昌」字輩，中文名由袁彌昌負責，英文名就由容海恩諗，不過兩個都話未諗好喎。

袁彌昌就話已經列出一個名單，但仲要繼續睇書同經典去諗，今個周末會畀其他人過吓目先。而容海恩就話要按中文名改個配合到嘅英文名，目前都仲係諗緊邊個字首嘅階段，睇嚟改名真係一個大工程。不過，容海恩仲要求老公，幫手諗多個花名喎，睇嚟袁彌昌要諗爆頭喇。

另外，老人家話坐月期間唔可以洗頭，容海恩就話已經剪短咗頭髮作準備，以免有一段時間唔可以洗頭，加上頭髮又長而變得「黐立立」喇。