政Whats噏：肥老闆「行」出腰型　被太太爆易攰

金融服務界立法會議員張華峰(肥老闆)有番咁上下噸位就人所共知，但最近見佢有番少少腰型，唔知有咩減肥絕技呢？肥老闆今午(20日)舉家出席活動時，佢就笑話係一字記之曰：「行！」但張太就大爆肥老闆懶，行一陣就要坐低。

肥老闆獲邀出席扶康會步行籌款活動時，問到平時有無做開運動？佢即刻「騷肚」反問：「你唔覺我瘦咗咩？」望落又真係有番少少腰型，佢仲話係平時食飽飯會去行吓散步，點都郁吓。

問到太太有無逼佢減肥，肥老闆都唔敢講，更即刻望向遠處話：「唔好亂講啊！」張太則坦言無逼，只係醫生都叫肥老闆要郁動吓，所以夜晚食飽會一齊散步，平時又出街行吓，但大呻老公起初行一陣就攰，成日搵藉口坐低飲咖啡，好彩依家有啲成效咋。