政Whats噏：葉議員叫邊個？蔣麗芸阻葉劉發問

如果兩個人姓名太相似，稱呼起嚟都幾混亂，甚至會出現蝦碌情況。今日(21日)嘅立法會上，就有名字相似而引起嘅蝦碌情況，但主角竟然係完全唔關事嘅議員蔣麗芸。

話說今日嘅公務員及資助機構員工事務委員會會議上，傾緊未來會議可以跟進咩議題，唔少議員都好熱心爭住舉手，包括有議員葉劉淑儀、葉建源、潘兆平等等，搞到主席范國威都叫大家等等先，等佢匯報埋先喇。

范國威講完一輪叫「葉議員」發問，當葉劉開口時，坐附近嘅蔣麗芸就指正，大聲話呢位係葉劉淑儀而非葉建源，搞到葉劉都窒咗窒。

葉劉之後就幫口話范國威係叫「葉議員」，而佢都係葉議員，連聲話OK嘅、無問題，睇嚟今次係蔣麗芸太掛住上個年度嘅教育事務委員會擔任佢副手嘅葉建源，先聽錯葉議員做葉建源喇。

喺下午嘅政制事務委員會上，蔣麗芸發言關注依家立法會選舉提名門檻、同埋點票時間問題。喺佢發言完畢後，委員會主席張國鈞就話佢嘅發言超出討論範圍，搞到佢即刻發火鬧張國鈞，話要投訴張，仲要佢讀出今日討論嘅動議添。佢仲解釋，話自己對今日嘅議題冇興趣，所以先講自己關注嘅事項，仲堅稱自己冇超出範圍。聽到蔣麗芸嘅言論，唔少議員都喺會議廳內大笑，緊接要發言嘅議員仲一度笑講唔到嘢，仲話蔣麗芸好有趣、好可愛添！