政Whats噏:月內劈價一球賣樓 梁美芬豪言我鍾意

2019年01月21日 17:12
東網電視
更多新聞短片
劈價100萬賣樓,梁美芬話:「我鍾意賣就賣!」(設計圖片)

立法會議員梁美芬(Priscilla),喺上個月劈價「一球」,即100萬港元賣出一個黃埔花園嘅單位!唔通連佢都睇唔好個市,急住走貨?Priscilla卻任性地話:「我鍾意賣就賣!」佢梗係鍾意喇,事關佢賣呢層樓帳面計仲賺咗347萬港元,少賺100萬港元濕濕碎喇!

根據立法會2016年嘅申報,Priscilla擁有4個住宅物業,九龍西有2個,其中一個物業透過公司持有,另外喺新界西區同美國各有一個物業。至2017年9月,佢又再喺九龍西買入一個辦公室物業,都係透過公司持有,前後合共5個物業。

直至今年1月4日,佢又向立法會作出申報,當中已經唔見咗美國嘅物業嘞,跟住再喺1月14日,佢申報九龍西只係擁有一個由公司持有嘅住宅物業,好明顯放咗一個。據了解,Priscilla舊年11月放售紅磡黃埔花園中層單位,實用面積389平方呎,叫價730萬港元,但一直無人吼,上月先減至670萬港元,冇人吼,最終劈價100萬港元,以630萬元賣出單位。

問到點解急住走貨?Priscilla笑住否認,話只係想令投資更為多元化,佢舊年亦賣咗美國嘅物業,形容係好正常買賣,唔使覺得太奇怪。但劈咗100萬港元喎,係咪唔睇好個市?佢就話出售價同心目中價位差唔多,「我鍾意賣就賣」,無乜話點解劈咁多。照咁講,初初叫價730萬港元,咪係吊高嚟賣?

一下子袋咗幾百萬港元,啲錢會轉向投資乜嘢?佢就話覺得好多年輕人搞初創好辛苦,或者考慮吓投資初創企業,或者喺其他地區買物業都唔定,總之佢向投資委託人唯一要求「唔買山旯旮嘢!」

Priscilla冇多講究竟個單位有冇賺。不過,根據土地註冊處資料,早喺2010年,佢以私人名義購入呢個單位,當時成交價約283萬港元,依家以630萬港元賣出,帳面已經賺咗1.2倍,即係347萬港元,可謂賺到笑喇!如果依家唔賣,話唔定等多幾個月,樓價繼續跌,又唔見幾十萬呢?