政Whats噏:立會外判工加飯鐘錢 行管會懸而未決

20190122
東網電視
更多新聞短片
立法會外判清潔工加飯鐘錢一事,行管會至今仍懸而未決。
唔少政府部門同公營機構會外判清潔工服務,立法會人力事務委員會喺舊年二月通過無約束力動議,要求將「飯鐘錢」納入外判承辦商投標條款之內。事隔一年,據了解,立法會行政管理委員會最近終於排咗上議程討論,立法會外判清潔工新標書會唔會要求納入「飯鐘錢」同約滿酬金,但普遍委員都認為,政府自己嘅外判合約都未加「飯鐘錢」,現時合約又未完,下次會議再算,即係議案懸而未決。
綜合多方消息,委員擔心現時嘅外判承辦商合約未完,如果加「飯鐘錢」,政府未必會畀返錢立法會,又難要求承辦商中途加錢,所以達共識下次再算。另外,會上亦有討論合約清潔工轉由立法會直接聘用,但秘書處則「溫馨提示」立法會有退休年齡,如果要改可能令部分清潔工失業,因此無通過到呢項建議。
立法會秘書處回覆,話行管會早前討論咗立法會綜合大樓嘅外判清潔服務,考慮咗相關因素,包括外判商嘅額外承擔等,決定現有合約喺今年9月14日屆滿後,繼續由外判承辦商提供服務,而立法會人力事務委員會近日再次討論政府外判服務,立法會會適時檢討。