政Whats噏：容海恩順利誕B女　重3公斤

新民黨容海恩(Eunice)同該黨前政策總裁袁彌昌(Derek)嘅BB，今朝(23日)9點28分出世啦，係女仔嚟嘅，重3公斤。下個月先至係農曆新年，即係BB女趕唔切做小豬女。

Eunice係香港首名任內生BB嘅女議員，佢今午發咗張最新嘅全家福畀傳媒，BB女眼仔都未打開，但似乎都眼大大，相當得意，Derek全程都喺產房陪住佢，而BB女依家仲未改名。

Eunice形容生B過程非常順利，多謝各位嘅關心同祝福，好快會帶BB同大家見面咁話，自己今日仲未落得床，B女出世都有排忙，希望B女夜晚會乖，唔會令佢哋咁辛苦。佢又話會努力學習做媽媽，預計下月底公布財政預算案時應該已重返立法會，至於確實幾多號返立會，就視乎復原時間同照顧BB嘅安排嘞。祝Eunice同BB女都身體健康！

Eunice早前講過，預產期原本係年初一(2月5日)，擔心好難搵醫生，所以決定提早開刀生，早過「立春」，即係豬BB會變成狗BB嘞。

新民黨主席葉劉淑儀覺得好開心，仲話聽日會去探Eunice添。問到會唔會同BB女上契，佢就話睇吓對方願唔願意契佢。而喺改名方面，佢就話要留返畀Eunice同Derek決定，仲透露根據Derek屋企嘅族譜，個名要有個「昌」字，所以佢哋仲未諗掂。佢仲話Eunice會等身體同精神情況許可下就會返工，未必會等到坐足月。