政Whats噏：派4千蚊甩轆　田北辰嘲陳茂波唔識接波

財政司司長陳茂波(波叔)正就新一年度嘅財政預算案諮詢各界意見，拍片叫市民交個波畀佢，又叫網民畀意見，佢會接波，點知籌備咗近一年嘅派4000蚊嘅關愛共享計劃，一派表就甩轆，畀市民鬧爆，就連立法會議員田北辰今日(24日)都喺Facebook上載咗張相，嘲波叔唔識接波呀！

田北辰喺Facebook擺咗張接波相，仲留言話係佢上年同100個小朋友踢波，學有所成做咗「門晨(神)」，仲話「財爺，咁樣先叫做正面接波喎。」佢又話早前佢所屬嘅組織同財爺見面，交咗寫滿建議嘅波畀財爺，希望財爺真係正面接到佢哋個波。

呢張相出咗之後，有網民亦揶揄波叔玩嘅係閃避球，要政務司司長幫佢補漏拾遺同執手尾，亦有網民留言鬧爆「政府話派嗰4000蚊，畀呢個波玩到謝，最好叫呢個波，去吓深水埗、旺角，自己問下啲市民有乜嘢意見，應該好精彩」；另有網友話「財爺唔搞搞震都已經保佢大⋯⋯」睇嚟呢個波真係好唔掂。