政Whats噏：怕公家嘢污糟　梁美芬常備私家咪

議員經常都要揸咪講嘢，所以支咪乾唔乾淨都好重要，立法會議員梁美芬(Priscilla)早前講起近日有少少感冒時，話自己喉嚨比較敏感，如果個咪太污糟就好容易染病，所以佢會隨身帶備兩支喺深水埗鴨寮街買嘅私家咪，擺定喺車上，亦會帶定咪套喺必要時用，實行雙重保障咁話。

佢話以前見過一啲公家咪好污糟，入面全部都係啡色，唔使驗都知好多細菌，不過佢從政初期都唔識保護自己，見到咁污糟都照用，所以特別容易病，後嚟喺一次地區活動上，見到一個粵劇老行尊自備私家咪，佢就有樣學樣去鴨寮街買定兩支私家咪，咁就衞生好多嘞。

佢仲話，如果私家咪無法接駁場地嘅音響，佢都有兩手準備，就係常備幾個咪套喺身，一旦要用公家咪時就會用，咪套就同紙巾一樣，長期買定幾百個喺屋企，雖然聽落唔係幾環保，但有時為咗衞生都冇辦法啦！