政Whats噏：鄭泳舜食唔停　煮食差被嘲地獄廚神

一直有玩開三項鐵人嘅議員鄭泳舜(Vincent)自進身立法會後，甚少參加比賽，更忙到冇時間返區議會添。Vincent今午(27日)召開記者會介紹深水埗新春美食墟市，但佢到場後由頭食到落尾，舐盡雞蛋仔、牛丸、牛肉餅同粢飯，連包粢飯啲食材都唔放過，難怪過去一年睇落「有福氣咗」！

Vincent咁食得，原來係尋晚(26日)到今午都冇食嘢，朝早仲去參加慈善跑，所以餓到「大開食戒」，但食得又唔一定識煮嘢食。佢今午連同檔主示範煎牛肉餅時，只係幫手落吓油，整粢飯時更係顯得雞手鴨腳，畀在場嘉賓笑係「地獄廚神」。不過佢堅稱自己有入廚房，最叻煮餐蛋麵喎。