政Whats噏：雙料議員有望免扣薪　政府被指捉錯用神

政府早前向立法會提交文件，公布檢討區議員酬金同津貼嘅安排，當中包括身兼行政會議成員或立法會議員嘅區議員，下屆起唔使再被扣減三分之一嘅區議員人工。呢個建議能夠令到「雙料議員」受惠，不過政府可以換到嘅掌聲就唔算多，議員仲趁機要求再畀多啲添！

立法會民政事務委員會今日(28日)開會檢討區議員酬金及津貼安排，唔少「雙料議員」都話歡迎。例如身兼東區區議員嘅批發及零售界邵家輝就大嘆，「雙料議員」時間安排上好辛苦，不過並唔代表佢哋會Hea做，唔會只開三分二嘅會議，亦都唔會幫居民做三分之二，所以認為只得三分二人工對「雙料議員」並唔公道。

邵仲講到，坊間有聲音話「雙料議員」出席唔到所有區議會會議，所以扣人工係合理嘅，但佢就話議員已經疲於奔命，而且立法會議員都不時要面對同時開3個會議而唔能夠出席，咁係咪又要扣減立法會議員嘅人工？連非「雙料議員」嘅金融服務界張華峰都幫口話，取消扣減人工做法係對議員服務社會嘅肯定，仲話現時市民對區議員要求不斷提高咁喎。

身兼北區區議員嘅林卓廷就趁機鬧政府，話區議員嘅角色好重要，可以講得上係無可取代，好似近期派4000蚊嘅亂局，如果唔係有區議員幫手，民政署開24小時都搞唔掂喎！議員葛珮帆都大嘆區議員辦事處工作繁重，好似近期派4000蚊做到佢哋「癱瘓」，所以都希望有更多資源可以至少請到兩名議員助理。

元朗區議員兼區議會(第二)鄺俊宇就話，與其取消扣減「雙料議員」人工，不如研究增加區議員嘅營運開支，吸引熱心服務嘅人加入團隊，亦令區議員有財力做地區工作，唔使再以薪津補貼。身兼南區區議員嘅區諾軒都歡迎政府改善區議員待遇，但就認為政府捉錯用神，應該全面檢討薪酬安排。至於本身係北區區議員嘅劉國勳就話，非公屋嘅辦事處租金高昂，租完後只夠請一名助理，希望有補貼畀非公屋區嘅議辦囉！

面對眾多議員要求增加資源嘅藉口五花八門，民政事務局局長劉江華就好老定咁話，每個選區特點唔同，靈活、自由調動撥款最好，過去2次檢討時已經大幅提升議員嘅營運開支，不過政府要平衡區議會困難同公帑嘅運用喎！