政Whats噏:與訪客咪兜前違規合照 劉業強話一時大意

20190128
東網電視
更多新聞短片
劉業強帶同老友係咪兜前合照,事後回應指因一時大意。(溫國佳攝)
人類總要重複同樣的錯誤!近年唔少議員帶團參觀立法會時,都會有團友違規喺咪兜前合照,一嘗做議員嘅滋味,卻令帶團議員要「耍冧」。今午(28日)有不少議員輪流喺立法會二樓咪兜回應時,東網記者就發現議員劉業強帶同數名訪客喺一樓參觀有講有笑,其中兩人更拉埋劉喺咪兜前合照。劉回覆查詢時,就解釋話係一時大意唔醒起。
佢又話,今日約咗幾位已退休嘅朋友食飯,之後就一盡地主之誼帶佢哋參觀立法會,由於朋友們未嚟過,大家都覺得好新鮮,周圍影咗好多相,剛才喺一樓就係太開心,朋友叫到就行埋去合照,一時醒唔起,會通知番佢哋違規問題,下次唔會嘞。
查實近年愈來愈多人唔守規矩,立法會秘書處都已經放咗告示喺咪兜,指明大樓內採訪位置只供立法會議員、政府官員及獲邀出席委員會會議嘅團體代表及公眾人士使用,其他人士不得使用採訪位置作任何用途,包括與議員合照。下次要睇清楚,唔好再亂影相喇。