政Whats噏:柯創盛起感冒莫乃光曾外遊 捐血被DQ

20190130
東網電視
更多新聞短片
因柯創盛咳咗兩三日,護士為安全起見就唔畀佢捐。(徐家浩攝)
立法會再有議員被取消資格(DQ)!不過,今次並唔係DQ議員資格,而係無得喺今日(30日)嘅捐血日上捐血啫,而事主就係立法會議員柯創盛(柯仔)同莫乃光,兩個人只能拎住張其血型牌道具影相打卡算數喇。
其實柯仔同莫乃光同樣都係填晒表,做埋基本測試先畀DQ。柯仔話咳咗兩三日以為冇大礙,點知護士就話佢感冒啱啱起,安全起見而唔畀佢捐。佢就話每年都會去捐兩至三次血,現時惟有等下星期病愈再去捐血站,不過下星期正值農曆新年,柯仔打算新正頭就大出血?
至於莫乃光就因為月初喺泰國返港,而捐血規定外地返港要隔28日先可以捐血,偏偏只差一日先夠期。不過佢就話立法會將於4月份再辦捐血日,到時就會再去捐。而佢嘅血型為AB型,只有AB血型嘅人啱用,所以佢更自嘲孤寒添!
立法會秘書長陳維安捐血時就撞正有醫學界議員陳沛然同行,見到有醫生陪住,陳維安都即刻大呼安心。佢哋兩個同樣係O型血,不過陳維安話自己係素食者,血脂比較少,佢仲話放假後血庫會有缺血情況,而外遊後又要隔離一段時間先捐得,所以就呼籲捐血者應該放假前好去捐血。
另外,議員陳振英亦都有去捐血,佢就話大學時受同輩壓力而首次捐血,之後都有維持捐血習慣,不過隨住工作忙碌,連周末都要加班,捐血站開放時間都撞正要工作,所以有一段時間無捐過。而佢都有呼籲辦事處同事參加捐血日,點知有兩個同事長期服藥,所以有心都捐唔到血,至於女同事就擔心捐血後會頭暈而婉拒咗。