政Whats噏:立會請司機薪津有2.4萬 中英文要talk得

20190201
東網電視
更多新聞短片
立法會秘書處招聘貴賓車私人司機,包括負責揸立法會主席專車。
政府高官有專用座駕,立法會都唔例外,其中車牌「LC 1」就係立法會主席專用車。立法會秘書處最近刊登廣告,招聘貴賓車私人司機,每月薪酬加埋現金津貼逾2.4萬港元。司機嘅其中一個職責就係要揸立法會主席專車。據悉現任司機已工作超過10年,即將會退休。
根據立法會秘書處嘅招聘廣告,貴賓車私人司機其主要職責仲包括駕駛立法會行政管理委員會擁有或租用車輛、保持車輛清潔及性能良好、協助裝卸車輛載運嘅物品、同埋協助執行辦公室雜務。而司機仲需要着制服,同埋不定時工作。
人工方面,入職薪酬係每月2.4萬多港元,並按1個按年增薪額增至2.5萬多港元,每個月亦有現金津貼,現時津貼就有475港元。獲聘人士會按合約條款受聘,為期3年,完成合約而工作表現良好仲可以續約,同埋有約滿酬金。
應徵者需要喺本月27日前遞交申請,雖然望落薪金同福利都吸引,但都有一定嘅招聘條件,初步入選嘅申請者仲要考筆試同路試。應徵者要修畢中五或有同等學歷、要持有有效私家車、輕型貨車同埋私家巴士牌、要有10年經常駕駛經驗、非常熟悉全港街道路線和地點、同埋中英文口語能力都要良好等等。睇嚟要做司機唔止靠對手,仲要靠埋把口嘞。