政Whats噏：立會擺檔寫揮春　葉建源要畫豬

新年就到，當然要貼揮春應節啦！立法會教育界議員葉建源今日(2月1日)就喺立法會擺檔，即席揮毫幫人寫揮春，佢話自己寫過好多唔同嘅揮春，連中英夾雜、畫公仔都試過，有立法會職員聽到就即刻叫葉寫張「發過『豬』頭」，不過個「豬」字就要畫出嚟，雖然葉話自己未畫過豬，但結果都算畫得唔錯！

葉仲話好多議員、官員都有邀請佢寫，例如教育局局長楊潤雄就託佢寫張「家肥屋潤」，一嚟個「潤」字可以襯番佢個名，二嚟個「家」仲要突出「豕」字嘅部分，回應今年係豬年咁話。

另一立法會議員葉劉淑儀經過時就話：「嘩你咁醒，喺度擺檔，要收租㗎喎！」葉建源見狀即場問佢有咩揮春想要，不過葉太就冇乜心水，最後葉建源就送咗張「心想事成」畀佢，葉太見狀都即刻回禮，寫番一張「心想事成」送畀葉建源，仲話自己寫開隸書，所以啲字咪肥啲囉！