政Whats噏：政府派錢一鑊粥　柯仔誠意搭夠自己派

政府本月起開始接受申請關愛共享基金4000港元，但申請手續繁複，劣評如潮，市民同地區人士都怨聲載道。立法會議員柯創盛(柯仔)早前已經怒插派錢派到亂晒龍，為幫街坊印申請表，連影印機都壞埋，佢身體力行話政府唔識派錢就由佢嚟搞，好似早前就係九龍東大派福袋畀長者同基層，實行自己做好過喇。

不過，柯仔話財力有限，但勝在誠意搭夠，所以花咗差唔多一個月時間派出3.5萬個福袋，超過3萬個家庭受惠，而且呢個活動並非一次性，而係已經維持咗12年咁耐。柯仔話，有唔少長者都關心自身權益，希望政府唔好咁涼薄，佢仲應承班長者，幫佢哋爭取應有權益。至於今次派嘅福袋即使未必為長者帶來即時重大改變，但都希望令佢哋感受到溫暖咁話。

其實長者有咁嘅睇法原因顯而易見喇，就係政府早前突然收緊長者綜援申請門檻，由60歲提高到65歲，官員期間仲要死撐同火上加油大講風涼話，最終咪搞到社會反彈極大，連本身安享晚年嘅長者都嬲埋一份囉。