政Whats噏：蔣麗芸豪派Pink豬　教兒童儲錢

豬年新正頭，唔少立法會議員都會以「豬」搞搞新意思，立法會議員蔣麗芸(Ann)就趁新春帶埋「豬仔」同傳媒聚一聚。佢介紹呢種粉紅豬共有400隻，另加400隻金色豬，全部都係錢罌，打算初七人日派畀九龍西嘅學童。咁即係只有一半機會攞到粉紅豬，可遇不可求嘞！

Ann話，派呢批豬係希望小朋友承諾儲利是錢，同時又會畀佢哋寫下願望，佢會組織一個評審委員會揀幾十個願望幫小朋友實現。如果小朋友嘅願望係買樓咁點呢？佢話送隻大啲嘅豬畀小朋友儲錢喎！

被問到點睇下屆九龍西立法會選舉，佢就話民建聯希望出兩隊，佢最大嘅對手係黨友鄭泳舜，因為始終同一個黨，要解釋畀選民聽點分開投票畀兩個人並非易事，不過以2016年選舉得票嚟睇，如果同路人畀多少少，應該夠兩席。不過佢之後補充，最終派邊個選同有冇佢份，仍然係未知之數。咁點睇同區嘅陳凱欣應否再參選呢，佢就話支持任何想參選嘅人，建制出三隊就穩陣啲；但近日有傳陳凱欣或重返政府做副局長，Ann就大讚做副局長福利多喎！