政Whats噏：陸頌雄百無禁忌　新年流流去執書

正值農曆新年，傳統上都有唔少禁忌，例如喺大年初一唔可以洗頭、新年期間唔可以買鞋等等。不過立法會議員陸頌雄就一於少理，趁新年期間去書店買書。不過今年年底就係區議會換屆選舉，身兼元朗區議員嘅佢，唔通真係唔怕「輸」？

尋日(7日)大年初三赤口，傳統上大家都唔會去拜年，以免新年流流嗌交。陸頌雄就話趁初三冇得拜年，就改去書局掃特價書。佢話百無禁忌，唔係好信「輸唔輸」依啲嘢，仲話執晒啲書就唔怕輸喎。原來佢成日去書局，仲話次次去親都有「選擇困難症」，因為對太多書都有興趣，今次都唔例外。

陸最終只係買咗4本書，因為怕買太多會睇唔晒。至於4本書係關於乜？佢就話係同歷史、文化有關，因為工作太忙，依類書冇時效性，可以慢慢睇。佢仲話，依4本書都係特價書，埋單都只係80蚊。

佢仲話，平時睇書多數以社會科學為主。身為攝影愛好者嘅佢，原來仲會買吓攝影集，喺影相時可以用嚟參考書中嘅構圖。佢仲透露，最初學影相時仲會透過畫人哋啲相，用嚟記構圖同埋甫士，喺見到類似嘅場景時就有意識去影喇。