山賊出沒：2賊仍在逃　大批PTU城門水塘搜山

2名女子昨日（7日）在荃灣衞奕信徑近城門水塘一帶行山，遇2刀賊遭劫走財物，案件由荃灣警區刑事調查隊跟進，正追緝賊人下落，至今日（8日）下午2時許，警方派出大批機動部隊警員到場，分批上山進行搜索。據了解，今次行動將歷時3日，今日為第1日，搜索範圍主要在主壩四周及附近村落。

事件發生後，一眾「行山友」議論紛紛，其中王先生表示，自己有10多年行山經驗，對於有山賊出沒不感到驚慌，指：「我之前都遇過（疑似山賊），睇得出佢哋唔係嚟行山，咪提高警覺望實佢哋，佢哋見你人多就唔會點，大家保持距離囉。佢哋專向弱者落手，如果得2個女仔，又開始天黑，危險性係高啲」。他建議行山人士盡量結伴同遊，最遲下午四、五點要落到山。

另一名女行山友懷疑賊人是非法入境者，指：「唔好天黑先行山，日光日白行唔驚嘅，佢哋（山賊）無咁大膽」，被問及有何應對方法，她稱：「提高警覺囉，有咩事有支行山杖，或者同佢（山賊）鬥快跑」。

而有約6年行山經驗的宋先生則稱，每星期行山1至3次，經常行城門水塘公園，指：「唔驚，我平時夜晚都係咁上嚟，（如果遇到山賊）咪畀啲財物佢囉」。另黃小姐及蘇小姐知道有山賊出沒，表示會減少到上址行山，倘遇賊人會高呼求救。

溫生及溫太稱，會盡量與其他人結伴行山，並會在天黑之前離開，避免去僻靜的山路或小徑，最重要是「錢財不可露眼」。而黃小姐稱會相約友人一齊行山，好好保管財物。

事發於昨大年初三，2名25歲女子到上址行山，被2名男賊持一把牛肉刀及2支木棍施襲打劫，掠去她們2部共值約10,000港元的手提電話、約1,000人民幣、約650港元及共值約850港元的手錶和首飾，賊人得手後逃去。警方正追緝2名約1.6米高，瘦身材，案發時身穿深色上衣及牛仔長褲的涉案男子。