政Whats噏：林卓廷揮春贈鄭若驊　籲早日下台

不論區議員定立法會議員，都會趁新年期間寫下揮春贈街坊。立法會議員林卓廷都唔例外，而佢除咗會開街站寫俾街坊，亦特登寫咗副對聯「不如歸去，造福香江」畀律政司司長鄭若驊，寓意叫鄭若驊下台，仲話打算寄副對聯去律政中心送畀鄭。

林卓廷仲話，喺開街站時都有唔少街坊反映對鄭嘅不滿，仲叫佢唔好放過鄭添。睇嚟鄭若驊唔止民望低，仲神憎鬼厭添，唔怪得林卓廷都話鄭「人無恥便無敵」。

講番寫揮春，唔少議員都會練定一手好字先會寫畀街坊，林卓廷就話自己喺三、四年前開始寫，初初啲字都好醜樣，所以特登買咗幾本字帖嚟參考下，仲會不停練字添。而佢其中一本參考書，係書法家顏真卿嘅字帖，不過佢就講笑，話自己寫緊嘅係「難睇」，而唔係「顏體」。佢仲透露，話自己寫揮春時會慢慢寫，用誠意搭夠，就算啲字再醜都唔怕。

有啲議員仲會扮下財神爺，林卓廷就話喺選區議會之前都有落區扮下。佢仲話，當時因為無乜人識，市民都唔知佢原來咁高，仲有人特登揭開佢件財神袍，以為佢係踩高蹺添，點知發現原來佢唔係假扮而嚇親。不過，依家都做咗一段時間議員，相信大家都唔會再質疑佢嘅高度喇。