政Whats噏：麥美娟索抱失敗　笑何啟明囝囝高竇

唔少地區人士都會喺農曆新年期間向市民拜年，而今日(9日)大年初五就輪到工聯會(工記)搞花車巡遊，先去港島區打響頭炮。立法會議員何啟明更帶埋囝囝同行而成為焦點，點知囝囝唔畀面議員麥美娟(Alice)，被笑高竇喇。

Alice一見到啟明囝囝就上前索抱，點知小朋友未熱身無反應。Alice大嘆啟明囝囝同另一名工記議員郭偉強嘅囝囝差得遠，因為後者只要出動汽水同玩具就好易呃，而且仲會好熱情稱呼佢做「靚女博士」添，有比較下難怪會笑啟明囝囝高竇。

啟明囝囝似乎係怕人多，事關一上到開篷巴士就由怕醜仔變到表情多多，啟明更話囝囝第一次坐，更玩到唔願落車添！另外，佢哋兩父子喺活動上玩騎膊頭，啟明只用單手就扶住囝囝，睇嚟平日玩得多所以咁熟手。至於郭偉強今次就收埋囝囝，佢解釋尋晚(8日)玩得太夜，巡遊一早舉行就由佢瞓多陣喎。