政Whats噏：鍾國斌埃及遇沙塵暴　影相唔准笑

唔少人喺農曆新年期間都要忙住拜年，不過都有人選擇趁長假期去個旅行，好似立法會紡織及製衣界議員鍾國斌(Felix)就去咗埃及，仲連日喺Facebook貼旅行相，大爆自己去睇金字塔同獅身人面像時，咁啱遇上沙塵暴，唔單止啲衫袋吹到入晒沙，仲搞到影相都唔可以笑，事關只要一開口就會成個口都入晒沙咁話！

查實埃及去年底曾爆發恐襲，但Felix嘅行程就一早安排好，搞到佢都好糾結去唔去好，最後決定照去。好彩去到發現周圍都有警察，仲有一批Tourist Police(旅客警察)，似乎係專為遊客而設，睇落當地政府都相當重視遊客，Felix見狀先覺得安心啲。

一場嚟到又冇理由剩係睇金字塔嘅，Felix仲有去紅海同尼羅河，見到紅海啲水又清又靚，Felix都忍唔住要落水玩吓。不過落到水先發現睇就過癮，落到去就凍到震，特別係喺水底返上嚟時特別凍！至於尼羅河，Felix都話睇落水質都唔錯，不過就冇落水喇，事關河底有鱷魚，只係表面睇唔出啫。