政Whats噏:梁耀忠衰氣纏身 鄧家彪選情不穩

20190209
東網電視
更多新聞短片
梁耀忠與鄧家彪今年運勢似乎麻麻,或會影響選舉成績。
區議會換屆選舉將喺今年11月舉行,好大機會時值農曆10月,當月運程或許反映部分人爭取連任或上位嘅成功機會。香港術數家協會術數師楊子東直言,雙料議員街工梁耀忠(阿忠)喺10月運勢奇差,「做咩都撞板」;而工聯會鄧家彪(阿彪)入冬後運勢亦急跌,或會影響選舉成績。
阿忠係葵青區議員,其立法會「超級區議會」功能界別議席亦係憑區議員呢張入場券。不過,楊師傅指阿忠八字用火木,喺「大水」豬年遇水剋火,官殺受剋,意味全年都冇乜作為,加上咁啱喺農曆10月運勢最差,做咩都撞板,愈做愈錯,不如「Hea」吓好過,而且仲要顧好身體同小心交通意外,總之一句講晒,10月係衰運纏身啦!
至於阿彪,連輸兩場立法會新界東選舉,包括2016年換屆同舊年補選,運勢認真麻麻,豬年又點呢?楊師傅話,假如區選喺農曆7至8月舉行,阿彪仲有望憑好運氣當選,但係入冬後運勢急跌,預料佢由離島轉戰沙田區嘅勝算將受影響。此外,阿彪喺農曆3月同4月分別要小心破財同交通意外。
另一位有機會喺農曆10月食白果嘅,就係舊年4月鬧出涉強搶保安局女行政主任手機醜聞嘅民主黨雙料議員許智峯(峯鴿),楊師傅話假如今年峯鴿再闖禍,不但因為今年運氣差而付出更大代價,仲會被同伴離棄添!
同樣農曆10月當黑嘅仲有議會陣線立法會議員朱凱廸,雖然佢未有表明會參加區選,但根據楊師傅所算,朱嘅性格鍾意越級挑戰,有運氣的話仲有些少機會成功,但運氣差就肯定唔使諗,好似區選嗰個月,佢就冇運行,就算幾努力參選都只會徒勞無功。
咁邊個農曆10月大旺呢?楊師傅話係盤據將軍澳多年嘅西貢區議員「哪吒」方國珊,佢豬年運程唔錯,死都救翻生,但亦提醒哪吒瑣碎事多,尤其係農曆11月或惹官非,處理得唔好隨時抵消全年好運咁話。