政Whats噏：張宇人割膽後　一食肥膩即屙

好多人做完手術後，都會有後遺症，立法會議員張宇人(Tommy)去年做完割膽手術，原來之後都有同廁所有關嘅後遺症。佢今日(11日)出席自由黨新春團拜時講起手術嘅身體狀況時話，依家一食肥膩嘢，就要即刻去廁所。聽落都幾忙！

今次團拜適逢人日，Tommy帶埋蛋糕嚟到，仲同黨友鍾國斌一齊吹蠟燭添。Tommy話，雖然醫生叫佢唔好食咁多肥膩嘢，不過佢仲有食㗎，只係依家食肥膩嘢前，會望清楚個廁所喺邊度。睇嚟做足準備喎！

佢又話，依家體重會喺幾日之間上落幾磅，近日試過原本169磅，食咗幾日年糕就肥咗幾磅，之後又回落番，最肥就係飲酒，有次佢特登叫司機返屋企先，等自己考慮到要揸車就唔會飲，點知見到支靚酒，忍唔住打畀司機話「冇咗你唔掂呀」，搵對方返轉頭幫手，結果飲完肥咗5磅喎。