政Whats噏：人日送大禮　政黨祝鄭若驊豉椒炒魷

「放生黎智英、唔告梁振英」嘅律政司司長鄭若驊，上任以來爭議不斷，長期成政黨狙擊對象。今日(11日)大年初七「人日」，有政黨就向鄭「送大禮」，贈對聯「僭建枉法鄭若驊，早日歸去救香港」，促鄭問責下台救香港。

民主黨中委會今日搞新春團拜，席間3位正副主席分別煮咗3味餸贈政府，「紅椒司炒魷」嘅豉椒炒魷魚，寓意民望長期「墊司底」嘅鄭若驊快啲被炒魷魚，問責下台改善香港司法；「長者年齡唔好推糕」嘅煎蘿蔔糕，希望收緊長者綜援門檻唔好延伸至其他政策；「老人家都敢蝦」嘅黃金蝦、提醒政府唔好再恰長者。

不過，喺煮餸期間主席胡志偉同副主席尹兆堅有啲「揦手唔成勢」。胡一人開3鑊煎糕，但就未能「一眼關三」，搞到有啲糕起焦，而尹則一夫當關處理數十隻大蝦，更邊煮邊問「架生」喺邊，最令佢激氣係叫黨友買8隻鹹蛋黃，竟然買咗8隻鹹蛋，啲蛋白唔知點處理好喎。