政Whats噏:民主阿婆不甘寂寞 求英插手香港事務

2019年02月11日 18:54
東網電視
更多新聞短片
陳方安生聯同多個組織要求英國議會任命委員會,監察任何侵犯香港自由及自主嘅情況。

「搞事四人幫」之一嘅「民主阿婆」、前政務司司長陳方安生,過往多次去海外唱衰香港,踏入新一年亦繼續不甘寂寞,竟然去信建議英國插手香港事務。

有報道指,民主阿婆連同公民黨,以及40多個公民組織,共同提出建議,要求英國議會任命委員會,監察任何侵犯香港自由及自主嘅情況。而民主阿婆提交嘅書面建議中,就提及港府取締香港民族黨一事,以及拒絕續簽曾主持香港民族黨召集人陳浩天演講嘅前香港外國記者會(FCC)第一副主席、英國《金融時報》亞洲新聞編輯馬凱(Victor Mallet),認為上述例子已經反映出港府處事時已經不理國際睇法。

另外,民主阿婆又批評英國未亦有如《中英聯合聲明》所言,保障到香港嘅自由同權利,所以建議設立一個獨立於現時英國國會跨黨派中國事務小組嘅委員會,畀該委員會負責監察香港事務。

其實民主阿婆過往已經頻繁去海外唱衰香港,亦不時對香港時事及政治指指點點,但來來去去都係三幅被。其實佢喺香港嘅政治能量已經耗盡,不如慳番啖氣暖肚喇!