政Whats噏：劉小麗拍拖好過從政　麥美娟無嫁期

狗年年尾遇上暖冬，造就豬年伊始桃花朵朵盛開，至於政圈旺唔旺桃花就因人而異喇。香港術數家協會術數師楊子東指，至今仍然係單身嘅前立法會議員劉小麗今年桃花運勁旺，尤其年底最大機會成事；但係工聯會議員麥美娟(Alice)嘅桃花運就得「丁咁多」。至於財運嚟講，外號「肥老闆」嘅金融服務界議員張華峰最旺，特別係農曆11月投資會大有斬獲。

小麗喺2017年被取消立法會議員資格後，喺台灣南部墾丁沙灘同一名四眼男手拖手戲水，心花怒放，引起網民熱議，但事後就未見下文。不過唔使驚，楊師傅話小麗今年行正官運，豬年旺桃花，特別係農曆10月之後，有心成事的話機會最大。愛情同埋事業一向難兼顧，小麗桃花大旺背後，受唔起「官殺」，意味佢不宜從政，楊師傅甚至贈言「去拍拖好過(從政)啦！」

緣份嘅嘢無得強求，曾經自認「剩女」嘅Alice，感情生活向來備受政圈關注，楊師傅就話Alice八字用木金，今年豬年「大水」冇乜運行，桃花方面更加得「丁咁多」機會，如果想捉緊機會，就要睇緊啲農曆12月喇。不過楊師傅提醒Alice，就算真係有情人都好，真正姻緣至少要明年先到，不妨睇定啲喎。而去年「奉子成婚」嘅新民黨議員容海恩，上半年平淡但順利，下半年就要小心交通意外，農曆8月要避免去西方國家同小心利器。

財運方面，喺投資界打滾多年嘅肥老闆屬強土命，豬年「大水」年就啱晒佢，農曆7月及8月會有大作為，由佢提出嘅政策可令市民受惠。而佢嘅投資運勢會喺農曆11月大爆發，喺三合水局下，佢嘅八字形成大財局，投資會有大斬獲，放膽跟佢投資都可能有運行喎！不過投資同風水命理一樣都係好難講，信定唔信就要自行判斷、評估及承擔風險。