政Whats噏：劉燕卿臨別發炮　轟部門各自為政

專責處理市民對政府部門或公營機構行政失當嘅申訴專員公署，每年閒閒地處理數千宗投訴，經常點名批評部門辦事不力。已年屆67歲嘅公署專員劉燕卿(Connie)將於下月底任期屆滿後離任，臨別依依都繼續炮轟政府各自為政，佢更溫馨提示各部門係「一個政府」要互相協作。唔通暗示緊「打呔就興奮」嘅政務司司長張建宗要落力啲認真做嘢？

Connie先後做過消費者委員會同申訴署兩大主理投訴嘅公營機構，喺上任申訴專員時曾被質疑冇喺政府架構內做過嘢，管唔掂，佢今日(12日)接受電台訪問時卻直言，希望5年任期內嘅工作成績，可以證明自己正因為唔係公務員出身，喺調查或監察政府時更冇包袱，真真正正以市民利益為出發點。

佢又提到上任後，公署主動調查嘅個案由6宗增至12宗，當中有唔少具爭議嘅事件，包括天水圍嘉湖山莊對出巨型泥頭山、公屋輪候時間，以及由食物環境衞生署和屋宇署組成的滲水投訴調查聯合辦事處效率奇低等。佢更主張以調解處理投訴，成功嘅個案宗數由5年前的38宗，大幅增至去年的237宗，最快試過一日就處理完。

不過，Connie話鋒一轉，狠批政府部門之間各自為政。佢話有時候市民嘅投訴看似簡單，但好多時都涉及唔同部門，可惜冇部門牽頭去處理。佢希望公務員唔好忘記「一個政府」嘅原則，要多啲協作。對於公署被指係「冇牙老虎」，佢否認，但強調牙唔係用嚟咬人。仲話公署係活在陽光下，所有資料都公開透明，有嘅係公信力，更坦言不論面對商家定高官，只要講事實就冇所畏懼。

部門各自為政絕非新鮮事，可惜就算被公署批評到體冇完膚也好，鬧到班高官頭耷耷都好，政府都好似借咗「聾耳陳」隻耳咁，乜都聽唔到。好似近來派4000蚊都搞到一鑊粥，張建宗就出嚟認衰話跨部門政策有盲點，日後會親自主持高層次政策委員會喎。作為政府第二把交椅，張建宗不時都要負責協調跨部門民生項目，咪一樣瓣瓣唔掂，都係唔好掛住打呔「自High」，疊埋心水落力做嘢好過喇！