政Whats噏：林健鋒自爆日本之旅有「艷遇」

農曆新年期間立法會休會，身兼行政會議成員嘅立法會議員林健鋒(Jeffrey)就趁休會去咗日本東京旅行，期間仲有「艷遇」添！Jeffrey話，佢當日喺當地一間酒店嘅高級餐廳食飯，隔離位坐咗個20多歲嘅女仔，佢大讚對方身材高佻纖瘦樣又靚，不過佢當時就唔敢同對方傾太多偈，只知對方來自緬甸。點解？咪就係因為佢太太同個仔都喺隔離囉。

Jeffrey話，因為佢同太太係一月結婚，正值農曆新年前後同情人節，所以每年農曆新年佢都會同太太去旅行慶祝，繼去年佢哋結婚40周年去咗歐遊後，今年佢哋就同埋個仔一齊去東京。太太喺隔離「?住」，難怪佢見到靚女，都唔夠膽同人交流喇。

問到豬年有乜嘢新年願望，Jeffrey就好坦白，話希望可以增加家庭成員，被追問係咪想有豬年BB做孫，佢就話新抱都未有，邊有咁快喎。睇來佢都好想個仔快啲成家立室，佢囝囝真係要努力喇。