政Whats噏：黎棟國囑男士情人節咪錫住荷包

聽日(14日)就係情人節，相信唔少人都有計劃為另一半送上驚喜。前保安局局長黎棟國今日(13日)就千叮萬囑，叫男士唔好錫住荷包，唔通係經驗之談？

新民黨今日舉行新春團拜，為黎棟國加盟後首個農曆新年，不過佢就似乎掛住情人節多啲，講到明話係一年一次值得紀念嘅日子，所以就叫男士咪錫住荷包囉。不過，佢都有叫女士記得要細心欣賞所收到嘅花，似乎係分享男女相處之道喇。

南區區議員陳家珮去年底誕下B女，屋企唔夠住而開始留意租賃市場，先發現租金真係好高昂，所以希望新一年人人有安樂窩，而自己來年都面對修身嘅挑戰，事關聽講誕下第二胎後會較難修身，所以講笑話今年唔會祝人「豬圓肉潤」。

至於立法會議員容海恩(Eunice)仍放產假而未有出席，黨主席葉劉淑儀就無忘記佢，仲話聽聞Eunice仲未為囡囡改好名喎，葉劉體貼話Eunice有42日限期，而且花錢可以再延長限期添。