政Whats噏︰孖聶德權練跑　鄭泳舜肚腩搶鏡

一年一度嘅渣打馬拉松將於下周日(17日)舉行。一向都有跑開馬拉松嘅立法會議員鄭泳舜(Vincent)，就同都有跑開馬拉松嘅政制及內地事務局局長聶德權一齊練跑。不過，Vincent明顯比未做立法會議員前肥咗，佢跑步時個肚腩隨住佢嘅步伐上下晃動，真係睇見都感覺到其腰間嘅震盪。

話說Vincent將佢同聶德權練跑嘅短片上載至社交網站，片段中兩人講吓跑步經。聶話自己跑過3年馬拉松10K賽同兩年半馬賽事，仲曾經幫過香港防癌會籌款，覺得好有意思咁話。

Vincent就教路，跑馬拉松前唔好打邊爐或食生冷嘢，要食得清淡啲、多啲食澱粉質食物同注意作息等。佢仲提醒大家，跑步前搽啲潤膚露，減少身體同衣物嘅摩擦。片段中，兩人喺海濱長廊跑步時，突然有一名男子瞓低咗，究竟發生咩事？Vincent就喺短片貼文中賣關子，話「若遇突發要冷靜」，欲知下文就要留意喇。