政Whats噏:黃錦星曾一家9口逼兩張碌架床

20190214
東網電視
更多新聞短片
黃錦星(前)自爆曾試過一家9口瞓兩張碌架床。(陳嘉順攝)
香港土地問題持續,政府一直束手無策,環境局局長黃錦星就自爆細個時都面對土地問題,仲試過一家9口逼喺兩張碌架床,好似沙甸魚咁喎。不過佢嗰陣起碼都上到樓住到公屋,依家好多基層市民輪候公屋,真係等到頸都長。
黃錦星今日(14日)喺前身係公屋嘅深水埗美荷樓出席一個活動,佢話自己出生於一個草根家庭,當時一家人住深水埗唐樓,屋企得一張碌架床,父母瞓上格,佢哋5兄弟姊妹加塊板就瞓下格,好似沙甸魚咁。後來佢哋獲分配公屋,搬咗去慈雲山沙田坳邨,環境好咗,「一張碌架床變兩張碌架床」,家庭成員亦多咗,變成7兄弟姊妹,一家9口就瞓兩張碌架床。聽到黃咁講都感覺到擠迫感,可惜政府多年來都解決唔到房屋問題。
黃喺活動上分享唔少舊相,仲話細個自己着嘅衫都係表哥嘅二手衫,笑言每年都收穫豐富。適逢今日情人節,佢被問到送乜嘢畀太太做禮物時就賣關子,話已經問咗太太想要乜嘢禮物,但就唔會話畀大家知。佢仲自爆曾因送禮物問題而同太太發生拗撬添。
話說黃喺冬天出世,所以太太每年都會送冬天衫畀佢做生日禮物,後來愈來愈多冬天衫,有啲甚至只着過一兩次,佢就叫太太唔好再送,點知就激嬲咗佢,畀佢鬧「送嘢畀你都咁多嘢講!」後來太太仲明言,以後黃生日都唔使收禮物喇。雖然冇禮物收,但黃反而仲鬆一口氣,覺得解決咗問題,直言開心生活先係無價喎!