政Whats噏:邵家臻細時志願做牧師 瞞家人返教會

2019年02月14日 17:34
東網電視
更多新聞短片
邵家臻(右)講起細個曾諗過做基督教牧師或傳道人。(陳亦瀅攝)

唔少人細個作文都寫過「我的志願」,但唔知有幾多人長大後真係做到?立法會社會福利界議員邵家臻今日(14日)出席專業議政新春團拜時,就講起細個曾諗過做基督教牧師或傳道人,事關佢中學時期已經信教,而且非常投入教會事務,一星期7日都會去教會幫手,可惜當時屋企人比較傳統,唔鍾意佢去教會,所以佢唯有呃屋企人話出去打機、去玩,然後偷偷哋返教會,同其他同學仔呃屋企人話去教會,其實偷偷出去玩啱啱相反咁話!

至於諗住做牧師或傳道人,邵就講起佢中七嗰年,當時佢所屬教會嘅牧師過咗身,所以佢就想成為牧師,想繼續為教會做多啲,不過後來選擇咗讀社工,加上長大後對教會體制有唔同睇法,就放棄咗投身宗教,決定循社工呢條路繼續奉行自己嘅理念,仲話其實「牧師、社工、講師」做嘅嘢都差唔多,都不外乎「傳道、授業、解惑」啫!

雖然邵冇達成「我的志願」,但教會對佢影響都好大,事關佢話兒時說話口吃,經常畀同學笑,但喺教會聽道聽得多,潛移默化就學咗牧師說話嘅口吻,令佢時至今日無論喺立法會發言,或者喺大學教書時都不自覺用咗「牧師口吻」,加上佢成日拎住本筆記簿,就好似牧師拎住《聖經》咁,所以咪有人話佢似牧師囉!