政Whats噏︰容海恩百無禁忌 未坐完月就落區

2019年02月14日 17:43
東網電視
更多新聞短片
剛生產完的容海恩(右一)無視坐月禁忌,未夠一個月就復工落區。(容海恩 fb)

正所謂坐月坐得好,身體無煩惱,大部分女士生完BB之後都好重視坐月。不過上月23日先至生完B女嘅立法會議員容海恩(Eunice) 話咁快已經復工落區,仲去咗沙田沙角邨嘅大牌檔,似乎唔係太在意坊間嘅坐月禁忌咁噃。

今日(14日)係情人節,不過喺Eunice身邊嘅男人就唔係其丈夫袁彌昌,而係同佢同屬新民黨嘅沙田區議員潘國山等。事關佢哋三個就去咗沙角邨一間大牌檔。該大牌檔為領展租戶,將要進行裝修,要3個月後先再開業。Eunice就趁機會拍短片,叫領展啲租金「收順啲」,唔好咁貴,趕走啲小商戶。真係坐月都不忘「狙擊」領展。

雖然Eunice啱啱生完BB,但睇落去都容光煥發,精神唔錯,片段中大牌檔師傅仲大讚Eunice「好似靚咗咁多」添,氹到Eunice笑到不知幾開心。