政Whats噏：中樂團立會表演　盧偉國獨奏挑戰學生

好多人都知道立法會工程界議員盧偉國係音樂發燒友，精通好多唔同樂器，所以立法會不時舉辦嘅午間音樂會，邀請唔同學校學生到立法會表演時，佢多數都會出席，相當捧場。撞正今日(15日)嚟表演嘅係中樂團，可謂開正盧偉國嗰瓣，佢唔單止即場表演咗二胡同琵琶，仲分別挑戰吹笙同琵琶嘅同學即場獨奏，不過學生一啲都唔失禮，輕輕鬆鬆就完成挑戰！盧仲話自己雖然玩過好多樂器，笙同揚琴係少數佢唔識嘅樂器，而佢又覺得笙好好聽，所以先叫學生表演吓啫！

立法會秘書長陳維安就似乎鍾意打鼓多啲，表演完咗就即刻走去鼓前亂咁搞，搞到啲鼓走晒音，要同學仔幫手先調番啱個音，之後仲敲咗首《有隻雀仔跌落水》！原來陳中學時都學過鋼琴，仲考到6級，不過考8級就「肥咗佬」，之後就冇學喇，唔知尋日情人節，佢有冇善用自己音樂才能氹老婆？定只係送花就算？陳話已經係老夫老妻，所以情人節只係喺屋企食餐飯，仲話情人節花貴，所以送花通常都係老婆生日先送咁話。

講返音樂會，旅遊界議員姚思榮就話自己唔識樂器，反而佢以前啲同學就玩足幾十年，玩到今時今日每次同學聚會都會帶埋樂器出嚟，一邊食飯一邊演奏，原來佢以前嘅學校有要求學生喺跳舞、樂器、唱歌三選一，點都要揀一樣參加，不過姚就話自己對音樂興趣不大，當年揀咗較為輕鬆嘅唱歌，及後都冇乜再練，所以依家出席聚會，多數就係負責聽喇！

負責聽嘅仲有教育界議員葉建源，佢話細個時只係學過口琴，但其實佢最想學係笛，當年曾經買過啲相關嘅書，嘗試自學，可惜吹極都吹唔啱就放棄咗，畢竟佢細個時礙於屋企環境，根本冇機會去學，依家人大咗都冇乜動力再學，反而鍾意聽多啲咁話。