政Whats噏︰用公帑赴英睇脫歐　鍾國斌一心二用？

立法會內務委員會今日(15日)開會，討論保安事務委員會提名紡織及製衣界議員鍾國斌(Felix)，參加英國英聯邦議會聯合會舉辦嘅一個有關現代奴隸制項目嘅研討會建議。雖然話就話係去了解國際間對現行奴隸問題嘅睇法，但Felix似乎就另有諗法，事關佢喺會上就特別提到，赴英外訪期間正值英國脫歐限期屆滿，佢都好想第一時間睇下當地情況。Felix藉加研討會睇埋脫歐，究竟咁樣一心二用法，會唔會兩頭唔到岸㗎？

今次外訪係由公帑支付嘅，費用會喺議員外訪嘅津貼中扣除。對於由Felix代表立法會去英國倫敦參加呢個奴隸制項目研討會，各位議員喺內委會上都冇反對，就連已就有關議題撰寫私人條例草案嘅會計界議員梁繼昌(Kenneth)都話，有關議題商界都應該關注，所以都好支持Felix去睇。而Felix都話呢個議題依家好多國家都關注，明白國際社會都想了解香港嘅情況，佢都會去解釋畀外界聽。不過佢話題一轉，就話該外訪日期係3月26日至29日，而同月29日就係英國脫歐期限，所以都好想即時睇下脫歐對當地嘅影響。

聽到Felix咁講，同Kenneth一齊撰寫有關私人條例草案嘅法律界議員郭榮鏗(Dennis)就話，其實佢4月都會去英國探討有關問題，不過佢就更期待Felix有關脫歐嘅報告咁話。唔通Dennis都覺得Felix對脫歐嘅分析會精彩過佢講奴隸問題？