政Whats噏：李國麟斥陳肇始逃避　促「解剖」醫管局

香港公營醫療服務爆煲，唔少醫生護士都有返工冇收工，立法會衞生服務界議員李國麟上月已經同業界搞過集會，向政府反映問題所在，不過李今日(15日)出席網台節目時就指，集會都已經過去咗幾個星期，可惜食物及衞生局局長陳肇始至今都冇回應，又冇反建議，對陳非常失望，大鬧政府咁耐都冇反應係逃避問題，仲要求「解剖」醫院管理局，睇吓問題出喺邊度咁話。

李喺節目上批評，醫管局管治架構臃腫，管理層同前線醫護人員脫節，以為派魚蛋燒賣、潤手霜等幫手打氣，前線人員會受用，但其實前線人員忙到連飯都冇得食，結果就反問政府同醫管局：「係咪要叫病人唔好斷氣住，等我拎咗潤手霜先？」李仲話雖然舊時有官員巡查時都有「洗太平地」，但舊時係清番乾淨啲用品、地方，依家只係搬走啲病人，情況相差甚遠。

李又話礙於道德包袱，醫生護士好難罷工，所以李所屬嘅政黨專業議政今日都聯同醫學界議員陳沛然一齊去信畀特首，要求同特首會面，傾吓點解決醫療服務爆煲問題，李批評醫管局只加床位唔加人手嘅做法，又強調依家唔係資金問題，而係政府畀咗錢出去，啲錢落唔到去前線人員身上，結果唔知啲錢用咗喺邊，叫政府一定要監管好醫管局。