政Whats噏：電視政策虎頭蛇尾　罪魁蘇錦樑邱騰華

政府做事歎慢板並非新鮮事，有頭威無尾陣嘅例子亦多不勝數，就好似數碼廣播推行十二年，政府拖到上星期先宣布終止模擬廣播，難怪有學者開腔怒轟政府嘅電視廣播政策虎頭蛇尾，主事嘅現任同前任商務及經濟發展局(商經局)局長邱騰華及蘇錦樑絕對係難辭其咎！

蘇錦樑擔任商經局局長同副局長接近十年，但坊間對佢任內評價差劣，好似有免費電視發牌風波、美食車先導計劃、版權問題等，遺留一大堆爛攤子待人接手，而接任超過20個月嘅邱騰華能力亦有限，又秉承住蘇錦樑Hea做作風，好似去年有共享單車結束業務，就被指監管不力同支援不足嘅負評，呢兩任局長真係半斤八両。

而邱騰華最近就瞓醒，終於肯宣布將模擬廣播服務終止，會資助市民購買數碼電視，而騰出嘅部分頻譜會用作室內同室外流動通訊服務，其餘用作電視發展使用，總算追貼番社會實際需要同長遠發展，但始終慢咗太耐而換唔到掌聲，其中香港中文大學新聞及傳播學院講師梁麗娟更喺電台節目中鬧爆，話政府追唔到社會改變，仲好唏噓咁話「遲到總好過沒到」。

梁麗娟指，早喺2003年已經討論數碼廣播，並且喺2007年推行，與模擬廣播並行超過十年，而亞洲其他地區好似日本、台灣，更早喺2011年至2012年間全面改用數碼廣播，反觀香港同樣有條件早早終止模擬制式，騰出頻譜作其他用途，但就因不同原因拖至明年先做到。

香港比其他地區起步遲近十年，梁麗娟就大嘆令香港電視業錯過唔少發展黃金機會。佢更批評政府電視廣播政策虎頭蛇尾，起初野心勃勃發展數碼廣播，曾視數碼廣播為6大文化創意產業重要一部分，更打算引入競爭提升潛能，但呢個堅持無以為繼，更為整個電視業前進同創意帶來致命打擊，就算明年做到全面數碼廣播，經營者要搶番慣性收視都絕不容易，難以挽回流失嘅觀眾。

梁直指，香港電視業生態，已因為急劇轉變嘅科技而墮後，無奈政府抱殘守缺，無推行有效政策令電視工業前進，佢更形容月中宣布嘅政策理應早在十年前進行，難怪會大嘆今次決定唔知可笑定可哀喇。