政Whats噏：被指擅改會議時間　鄭泳舜否認一言堂

現時有廿多名立法會議員身兼區議員職務，呢班「雙料議員」點樣「分身」得宜，特別惹人關注，而身兼立法會議員嘅深水埗區議員鄭泳舜，踏入豬年就先「中箭」，被指擅改一個由佢主持嘅區議會委員會例會時間，有民主派深水埗區議員更投訴鄭此舉有先斬後奏之嫌。

話說深水埗區議會轄下嘅交通委員會以往喺逢周四舉行例會，但本月開始，有關例會改為逢周二進行，身為委員會主席嘅鄭泳舜成為眾矢之的。

鄭泳舜回應話，每年都會檢討區議會會議時間一次，當時係會議上都有詢問其他議員意見，直言若有異議就另作決定，否認自己係一言堂。

鄭又話以往例會曾經多次與立法會審議重要議案時間相撞，例如投票決定係咪引用《立法會(權力及特權)條例》，所以同議員商量後先決定更改委員會嘅例會時間，而會議紀錄同錄音都反映佢之前曾詢問各方意見，佢再三強調非因私人事務先改時間，希望議員能夠理解喎。