政Whats噏：明日大嶼下周首戰離島區會

施政報告提出「明日大嶼」計劃社會反對聲音此起彼落，最新文件顯示離島區議會將於下周一(25日)嘅大會上，率先討論計劃內容，惟政府仲未遞交文件冇得睇。另一邊廂，梅窩鄉事委員會主席兼區議員黃文漢同區議會副主席余漢坤率先為政府「背書」，動議支持明日大嶼計劃，引起民間關注組呼籲市民入信要求反對動議。

根據區議會議程，大會當天第二項就係討論明日大嶼願景，及後就到支持動議，希望當局盡快展開研究喺交椅洲和喜靈洲附近填海，建造人工島，以長遠解決香港的房屋問題、改善大嶼山同附近多個離島的對外交通，以及促進香港的長遠經濟發展。

團體「東大嶼都會關注組」就喺社交網站發起一人一信，呼籲各離島區選民向區議會提出意見，要求區議員反對「明日大嶼」。似乎呢個填海計劃已響戰鼓，未到立法會攞前期撥款已引起地區爭議。