政Whats噏:何啟明接棒危危乎?鄺志堅出山相助

20190219
東網電視
更多新聞短片
鄺志堅出山任何啟明的助理,希望確保交棒成功。(設計圖片)
立法會九龍東議員黃國健即將喺下屆退下火線,工聯會(工記)早前完成初選,敲定由勞工界議員何啟明接棒,原來立法會勞工界前議員鄺志堅出山,做現任何啟明嘅助理,過年後已經正式返工。鄺志堅話覺得對工記有個責任,見到何啟明接班接得特別辛苦,所以主動提出幫手,希望力保交棒成功。
本身係大律師嘅鄺志堅出身工會世家,一直喺九龍東同立法會前議員陳婉嫻(嫻姐)「拍住上」,佢2004年曾任立法會勞工界議員,卸任議員後,自立門戶做政治顧問專責為建制派新人抬轎外,更曾應徵過勞工及福利局副局長,但最終冇入政府,一度表明打算退休脫離政壇。
工聯會喺九龍東雖似穩有一席,但面臨黃國健交棒畀何啟明,仍有相當多不穩定因素。鄺志堅今次出山幫手,都直言九龍東喺嫻姐打落嚟後,其他地區團體進步大,令到工記會員流失,會員被吸納到其他團體,競爭好大,何啟明接班特別辛苦,自己對九龍東好熟悉,見到依家工記正處於世代交替,今次幫手希望確保交棒成功。
佢又透露,以前何啟明曾跟過佢做嘢,依家自己就做番何啟明助理,佢自言對工記唔係講錢,老土啲講,係有個責任,人工都係話隨便,但就唔可以做義工,因為義工冇身份,做助理才是真正落腳做,做啲嘢又到位啲,所以過年後就開始正式返工。
何啟明就話鄺志堅一直都係嫻姐軍師,二人一拍即合,希望搞好工記,自己助理普遍都係八、九十後,最後生嗰個都係得23歲,就算幾叻都要有人帶,鄺志堅以往係高手,好多計仔,無論係嫻姐同黃國健扮武松打虎,定係九龍東興建東九龍過山鐵路線都係鄺志堅嘅主意,對方仲好體恤佢,大幅降薪,只係收少少車馬費,如果畀到足,怕要成份開支都畀晒咁話。