綠色先鋒:淨灘教室 小學生落手落腳執垃圾

2019年02月20日 07:00
東網電視
更多新聞短片
近50名小學生參與淨灘,合共清走6袋垃圾。

人人都話要「走塑」,有小學老師們聯同環保商店,帶同一班稚氣未脫的小學生,齊齊走出教室,落手落腳到沙灘來一場淨灘活動。同學們親手清理灘上的垃圾,又就地收集物料製作濾水器,結合課本上學到的生態知識,實在地體驗一堂海洋保育課堂。

大人淨灘就聽得多,小學生淨灘會否變成「搞搞震冇幫襯」?浸信會天虹小學2班四年級的同學,日前由老師帶領,來到馬鞍山烏溪沙一處沙灘執垃圾。當日天氣雖然陰沉,仍無阻同學仔躍躍欲試的心情,不停問老師:「可以開始未呀?」

老師和工作人員為小朋友們分組和派發物資後,同學們即充滿幹勁,到處尋找垃圾蹤影。用不了多久,沙灘就變成大家的課室,面對灘上林林總總檢拾到的廢棄物,同學都表現得相當好奇,大呼奇怪,老師和工作人員則忙於解答同學的疑問,趁機上一堂生態教育課。

「執到好多塊奇怪嘅塑膠片,諗唔明點解會喺沙灘出現。」同學呂明芯從未參加淨灘活動,自言平時去沙灘只會游水,不會留下任何垃圾,對於檢到的各種塑膠製品感到疑惑,她擔心垃圾進入海洋,會危害海洋生物健康。鄭朗日則憶述,因2年前看見家人淨灘而躍躍欲試:「垃圾會污染環境,仲有可能會拮傷人。」楊子奇難忘執到死魚和皮帶組件:「好多奇怪嘢,如果唔嚟清,佢哋唔會消失!」

近50名同學最終合共清走6袋垃圾,帶隊的常識科老師王嘉蓉笑言同學們都能大開眼界:「平時講就講得多,真係畀佢哋去做都算得上係一次震撼教育。」她認為常識科很多課題都能夠應用在活動中,例如水資源、風向和氣候等,有助同學深化所學知識,亦可以反思自身的生活模式:「好多物件未必一定係垃圾,只要學懂活用資源,可以減輕許多環境問題。」

協助組織活動的環保商店BUCKET創辦人楊夏靖表示,活動能夠讓學生們切身感受到環境變化帶來的影響,「重點唔係執到幾多垃圾,而係佢哋感受到啲咩,原來現實中嘅沙灘唔係每個都咁靚。」他冀望同學們能夠從小培養環保意識,日後在成長的過程中亦能持續關注海洋保育的議題,支持不同環保運動。

除了進行淨灘,同學們此行另一個重任,是收集製作濾水器的材料,並用空膠樽收集未經處理的海水。除了沙礫、石頭外,同學亦可發揮創意,收集現場可見的物料回校嘗試。王老師解釋,能夠就地取材,由收集污水樣本,尋找製作物料都由同學一手一腳包辦,除了理論知識,學生更可進一步了解污染的成因和影響,令活動更添意義。
-----------------------

《骰寶坊》誠邀各地【賭王】【賭后】挑戰神人境界,每日更有百萬籌碼等你領取!

立即免費下載,體驗《骰寶坊》最真實、刺激的多人在線骰寶遊戲!

遊戲下載:https://goo.gl/i2t1yj