政Whats噏:容海恩攜B女見識立會 嘆餵奶壓力大

20190220
東網電視
更多新聞短片
容海恩透露終於為囡囡改好中文名,仲話餵奶真係好大壓力。(陳嘉順攝)
立法會議員容海恩(Eunice)上月誕下愛女,是首位女議員喺任內生BB。而B女出生至今仲差幾日先夠一個月,今日(20日)已經被帶到去立法會見世面,Eunice仲透露終於為囡囡改好中文名,仲話餵奶真係好大壓力。
Eunice現時餵哺母乳,「畀到幾多就幾多」 ,但自言好難、好大壓力同好辛苦,日日對住個奶泵苦惱住量同次數,過程仲好痛添,而佢未生B女前已入定媽媽谷學習。
Eunice又透露終於為B女改好中文名叫做袁昌蔚,有茁壯成長同茂盛嘅意思,英文名就仲未有定案,暫時都係叫住囡囡做BB、阿B先。
唔少議員知道Eunice帶埋B女到立法會,都特登去見吓佢哋,而B女就依然淡定,全程熟睡。議員葉劉淑儀就話好耐無抱BB,但手勢似乎無生疏。佢更講返女兒以前好曳唔肯飲奶,三四個月已經要食粥仔,所以個個BB情況唔同,佢就覺得B女好乖同好湊喇。